Ftoi demokratët të votonin PS-në, Bardhi i përgjigjet Ramës: Socialistët nuk janë dele që një mashtrues t’i marrë zvarrë. Ja pse do të refuzojnë në 25 prill

0
693

Pas deklaratave të kryeministrit Edi Rama nga Fieri, ku ndër të tjera ftoi edhe demokratët të votonin për PS-në, ka reaguar edhe Partia Demokratike.

Sekretari i Përgjithshëm i PD-së, Gazment Bardhi në një postim në facebook shkruan se Rama “që kur ka ardhur në pushtet, ka zbatuar model fyes për socialistët, duke mos i përfshirë kurrë ato në vendimmarrjen e partisë së tyre”, duke shtuar se kjo është arsyeja pse ata nuk do ta votojnë në 25 prill.

“Socialistët nuk janë dele që një mashtrues dhe besëprerë si Edi Rama t’i marrë ata zvarrë, duke i sakrifikuar që ai me bandën e vet të hajdutëve të mbushin xhepat”, thotë Bardhi.

Postimi i plotë:

Një orë fjalim përsëriti të njëjtat gënjeshtra, duke u shfaqur edhe njëherë si një Kryeministër i lodhur, i vjetëruar, pa ide dhe pa bilanc. Mjafton të dëgjosh Edi Ramën për të kuptuar se në 8 vite pushtet si Kryeministër dhe 23 vjet në politikë nuk i ofroi asgjë shqiptarëve, asnjë ide, asnjë premtim i mbajtur, asnjë zhvillim.

Socialistëve u ofron PËR DEPUTETË trafikantë droge, trafikantë vajzash, vrasës, hajdutë; PËR MINISTRA u nxjerr disa të korruptuar, klientë të vetët, shoqet e gruas, burrat e ish-grave të veta e plot anonimë të tjerë personalë që nuk dinë ku bie dera e PS; PËR DREJTORË u çon një çetë hajdutësh e injorantësh.

Që kur ka ardhur në pushtet, ka zbatuar këtë model fyes për socialistët, duke mos i përfshirë kurrë ato në vendimmarrjen e partisë së tyre. Kjo është arsyeja pse socialistët, si qindra e mijëra shqiptarë të tjerë të të gjitha bindjeve politike, nuk do ta votojnë Edi Ramën.

Socialistët nuk janë dele që një mashtrues dhe besëprerë si Edi Rama t’i marrë ata zvarrë, duke i sakrifikuar që ai me bandën e vet të hajdutëve të mbushin xhepat. Socialistët e ndershëm e duan Shqipërinë dhe zhvillimin e vendit, prandaj më 25 Prill do ta refuzojnë masivisht modelin e Komitetit të Hajdutëve të Rilindur.

© Panorama.al

LEAVE A REPLY

Please enter your comment!
Please enter your name here